දිඹුලාගල විහාරයේ සිට සැතපුම් 04 ක් පමණ දුරින් පිහිටි පුල්ලිගොඩ අතීත ලාංකීය සිතුවම් කලාව පිළිබද විදහා පාන තවත් ඓතිහාසික ස්ථානයකි.මෙහි ඇති ගල්ලෙන් ප්‍රාග් ඓතිහාසික මානවයාගේ ජානාවාස ලෙසපැවතී ඇති අතර පසුව වැදි ජනයා විසින් භාවිතා කර ඇත.පොලොන්නරුව යුගය වන විට මෙම ලෙන් භික්ෂූන් වහන්සේලාගේ නේවාසික ස්ථාන ලෙස භාවිතා කර තිබේ..මෙම ගල්ලෙන් සුවිශේෂී වන්නේ මෙහි ඇති ඉපැරණි සිතුවම් නිසාය.
1877 වසරේදී පමණ එච්.සී.පී.බෙල් මහතාගේ අවදානයට ලක් වු මෙම ඓතිහාසික ලෙන් 1944 වසරේදී පුරාවිද්‍යා දෙපාර්තමේන්තුවේ අවධානයට ලක් විය.ඒ වන විට එහි තිබූ බොහොමයක් සිතුවම් අව් වැසි වලින් විනාශයට පත්ව ගොස් තිබිණි.ක්‍රි.ව 09 - 10 වන සියවස් වලට අයත් යැයි සැලකෙන මෙම සිතුවම් පිළිබද පරණවිතාන මහතාගේ අදහස වන්නේ මෙම සිතුවම් පොලොන්නරු යුගයේදී සිතුවම් කර ඇති බවයි.මෙම සිතුවම් වල සම්ප්‍රදාය ,කලා ශෛලිය හා සිතුවම් ස්වරූපය අනූව මෙම සිතුවම් පොලොන්නරු යුගයට අයත් යැයි සිතිය හැක..
සීමීත වර්ණ රටා ප්‍රමාණයක් යොදාගෙන නිර්මාණය කර ඇති මෙම සිතුවම් අතර දැනට පැහැදිලිව දැකිය හැකි සිතුවම වන්නේ ඇතිරිල්ලක් මත හිදගෙන සිටින දේවරූප පහකි.එම දේවරූප වල හිස් වටා රැස් වළලු දැකිය හැකි අතර අතින් මල් දරා සිටී.අලංකාර ආභරණ වලින් සැරසී සිටින අතර උඩුකය පමණක් නිරූපණය කර ඇත.පරණවිතාන මහතාගේ අදහස වන්නේ මෙම සිතුවම බුදුන් වැදීමට පැමිණි දෙවිවරුන් පිරිසක් නිරූපණය වන සුවිශාල සිතුවමක කොටසක් බවයි.තවත් කුඩා සිතුවම් කිහිපයක් මෙහිදී දැකිය හැකිවේ.
No comments:
Post a Comment